Método Fiesta di Idioma disponibel
16-09-2010
Fiesta di idioma ta un método nobo pa siña papiamentu for di grupo 4 te ku grupo 8. E método Fiesta di idioma ta basá riba didáktika moderno i su presentashon ta kolorido, ku un diseño funshonal i kontemporáneo. E método ta destiná pa grupo 4. E promé tomo Fiesta di idioma A1 ku ta destiná pa grupo 4 di Enseñansa di Fundeshi ta disponibel for di sèptember 2010.
Tayer di Skirbimentu Kreativo
16-09-2010
Entre 1 i 10 di sèptèmber 2010 FPI a organisá un tayer di skirbimentu kreativo i un di 'Train the trainers' bou di guia di Sra. Ruth San A Jong, direktor di Schrijversvakschool Paramaribo. Total diesun eskritor i kuater guiadó a partisipá na e tayernan akí.
E eskritornan ku a partisipá na e tayernan ta: Nifa Ansano, Merly Augusta, Rudolf Crispulo, Mila Dorothea, Roy Evers, Elodie Heloise, Germaine Jong Loy, Ronny Lobo, Mishenu Osepa-Cicilia, Hubert Penza, Diana Pinto. Komo oyente tabata presente: Farienne Alexander, Noris Doran, Laura Quast i Ini Statia. Na e seshonnan di Train the trainers a partisipá: Roy Evers, Elodie Heloise, Laura Quast i Ini Statia. Aki tambe tabatin algun oyente presente, esta Farienne Alexander, Charlotte Doornhein i Noris Doran.
E eskritornan i guiadónan a haña lès i instrukshon den uso di e sentidonan, téknika di asosiashon, kreashon di personahe, intriga i perspektiva. Un gran sorpresa tabata bishita di eskritor Sonia Garmers ku e dosente a invitá pa bin lesa for di su kuenta pa mucha Waarom er geen appels groeien op Curaçao. Señora Garmers a konta tambe di su eksperensia ku skirbimentu i publikashon di e kuenta akí.
E tayernan akí ta forma parti di un plan mas grandi pa produsí buki pa mucha di 8 te 10 aña di skol di fundeshi. E guiadónan lokal ku a partisipá na e tayer di 'Train the trainers' lo sigui guia e eskritornan te ora nan manuskrito ta kla pa publiká. Pa organisá e tayernan akí FPI a risibí sosten finansiero di Prins Bernhard Cultuurfonds Nederlandse Antillen en Aruba.
Pa tur ku a partisipá e tayernan tabata inspirativo, instruktivo i fruktífero. FPI ta gradisí tur ku di un òf otro forma a kontribuí na éksito di e proyekto akí.
Banko di palabra
E buki Banko di palabra básikamente ta un lista di palabra na hulandes ku tradukshon na papiamentu. E ta sirbi komo un vokabulario traduktivo pa uza banda di otro dikshonario eksistente na papiamentu. E selekshon di dato léksiko den e buki akí ta basá riba palabra i frase kompilá for di práktika diario di tradukshon i di trabounan konsultivo na Fundashon pa Planifikashon di Idioma.
E buki ta kontené mas òf ménos 15.500 entrada. Tras di tur entrada a menshoná e klase di palabra i den kaso di sustantivo, kua ta e artíkulo definí na hulandes. Tin un kantidat di 110 proverbio, 420 ekspreshon, un kantidat di frase i parti di frase. E buki akí ta rekomendabel pa traduktor, intérprete, trahadó den medionan di komunikashon sosial i pa otro profeshonal.
Spèlchèk Office 2007 riba merkado
01-05-2008
E vershon di 2001 tabata funshoná ku Windows 98, Windows XP i MS Office 2003. E vershon di 2007 ta apropiá pa Office XP, Office 2003 i Office 2007 bou di Windows 2000, Windows XP i Windows Vista. E programa di kòntròl na papiamentu, kontrografia, ku e nòmber SpèlChèk ta kontené mas o ménos 33.000 palabra. Na 2001 Spèlchèk a gana Premio Ekselensia di asosiashon di prensa, Presa UNí. Preis di e Spèlchèk akí ta ƒ75,-
Proceedings Dominica
11-02-2008
FPI ta selebrá Dia Internashonal di Idioma Materno pa di dies aña konsehutivo. Den kuadro di e dia akí, den koperashon ku Universidat di Antia, ta organisá pa di kuater biaha un diktado papiamentu. Inskripshon ta habrí pa tur persona interesá. Pa mas informashon, tuma kontakto libramente ku Fundashon pa Planifikashon di Idioma, mandando un e-mail, yama na telefòn òf pasa personalmente na nos ofisina.
Ta uza komo norma di ortografia pa e diktado akí, e buki di ortografia di gobièrnu: Ortografia di Papiamentu 2007
Klek riba e kapítulo deseá pa kontenido di esaki
