Eastern Caribbean Conference 2008
02-12-2008
Entre 5 i 9 di novèmber 2008 UPR (University of Puerto Rico), UWI (University of the West Indies), UNA (University of the Netherlands Antilles) i FPI huntu a organisá 11th Annual Eastern Caribbean Island Cultures Conference 2008 na WTC, Kòrsou.
Djarason 5 di novèmber, tabatin un seremonia na Palasio di Gobernador kaminda a presentá FPI su último publikashon Linguistic Studies on Papiamentu, kual ta prinsipalmente un kompilashon di e presentashonnan tokante papiamentu na e konferensia di idiomanan krioyo CCC 2004.
Djaweps dia 6 di novèmber tabatin e apertura ofisial den sala Wayaka na WTC. Sr. Philippe Maurer i sr. Harry Moen tabata nos oradónan prinsipal.
Sr. Maurer a papia di e atlas di idiomanan pidgin i krioyo i a hasi un komparashon entre papiamentu i otro idiomanan krioyo. Sr. Moen a papia di e músika típiko di Kòrsou i a duna demostrashon di diferente instrumènt, e.o. kaha di òrgel.
Parti anochi tabatin un aktividat sosial riba e barku di bela Insulinde. Aproksimadamente 85 partisipante a subi e barku na Handelskade i a nabegá algun ora riba laman. Tur presente a pasa un anochi plasentero mientras nan por a disfrutá di un bufete di BBQ.
Djabièrnè durante henter dia tabatin presentashon i parti anochi FPI a ofresé partisipantenan un anochi kultural den Expo Hall di WTC. E presentashon kultural a kai mashá na agrado di esnan presente.
Djasabra tabatin presentashon parti mainta i parti atardi esnan interesá a hasi un rekorido den bùs na Bandabou. Esaki tabata alabes e klousura di e konferensia, ku tabata sumamente eksitoso. No solamente a kibra rekòrt enkuanto e kantidat di partisipante (105), pero tambe e kantidat di presentashonnan (60 paper) tabata mas grandi ku kustumber.
E komité lokal (UNA i FPI) a risibí gradesimentu di kòmplimènt amplio di UPR i UWI pa un di e mihó konferensianan den nan 11 aña di eksistensia.
Mi negrita, mi ruman
02-12-2008
A tradusí i imprimí e buki klásiko Mijn zuster de negerin. Ya pa algun siman kaba Mi negrita, mi ruman, ta disponibel na FPI i na librerianan lokal. E preis ta ƒ17,50.
Banko di palabra
E buki Banko di palabra básikamente ta un lista di palabra na hulandes ku tradukshon na papiamentu. E ta sirbi komo un vokabulario traduktivo pa uza banda di otro dikshonario eksistente na papiamentu. E selekshon di dato léksiko den e buki akí ta basá riba palabra i frase kompilá for di práktika diario di tradukshon i di trabounan konsultivo na Fundashon pa Planifikashon di Idioma.
E buki ta kontené mas òf ménos 15.500 entrada. Tras di tur entrada a menshoná e klase di palabra i den kaso di sustantivo, kua ta e artíkulo definí na hulandes. Tin un kantidat di 110 proverbio, 420 ekspreshon, un kantidat di frase i parti di frase. E buki akí ta rekomendabel pa traduktor, intérprete, trahadó den medionan di komunikashon sosial i pa otro profeshonal.
Spèlchèk Office 2007 riba merkado
01-05-2008
E vershon di 2001 tabata funshoná ku Windows 98, Windows XP i MS Office 2003. E vershon di 2007 ta apropiá pa Office XP, Office 2003 i Office 2007 bou di Windows 2000, Windows XP i Windows Vista. E programa di kòntròl na papiamentu, kontrografia, ku e nòmber SpèlChèk ta kontené mas o ménos 33.000 palabra. Na 2001 Spèlchèk a gana Premio Ekselensia di asosiashon di prensa, Presa UNí. Preis di e Spèlchèk akí ta ƒ75,-
Di kuater diktado papiamentu
11-02-2008
FPI a selebrá Dia Internashonal di Idioma Materno pa di dies aña konsehutivo. Den kuadro di e dia akí, den koperashon ku Universidat di Antia, ta organisá pa di kuater biaha un diktado papiamentu.
Dia: 7 di aprel 2009
Ora: 8 or di anochi
Lugá: oula di UNA
Inskripshon ta habrí pa tur persona interesá. Pa mas informashon, tuma kontakto libramente ku Fundashon pa Planifikashon di Idioma, mandando un e-mail, yama na telefòn òf pasa personalmente na nos ofisina.
Ta uza komo norma di ortografia pa e diktado akí, e buki di ortografia di gobièrnu: Ortografia di Papiamentu 2007
Klek riba e link aki bou pa kontenido di esaki
